Емтихандарға, әсіресе ҰБТ-ға дайындық – бұл тек оқу марафоны ғана емес, жасөспірімдер үшін үлкен психологиялық сынақ. Осы кезеңде, әсіресе емтихан қарсаңында, мазасыздық, үмітті ақтай алмаудан қорқу және эмоциялық кернеу айқын сезіледі.
Не істеу керек? Балаларға қалай көмектесеміз? Бұл мәселелер жуырда Әулиекөл ауданы Баганалы орта мектебінде өткен ата-аналар жиналысында қозғалды. Жиналысты педагог-психолог Қайдаулова Г.А. өткізді.
Көбіне біз, ересектер, жақсылық тілей отырып, балаға дәл осы сәтте ең қажет нәрсе – қабылдану сезімі, қолдау және оны балл үшін емес, сол қалпында жақсы көретінін сезіну екенін ұмытып кетіп, күйзелісті күшейтіп аламыз.
Мектеп психологы үйде тыныш әрі жайлы атмосфера қалыптастыруға, балаларды қысымсыз, дұрыс ынталандыруға, сөзді жүрекке жететіндей, демеу болатын түрде айтуға көмектесетін нақты практикалық ұсыныстар беруге тырысты.
Ата-аналар маңызды қорытындыға келді: отбасындағы сенімді қарым-қатынас пен эмоциялық тұрақтылық күйзеліс деңгейін айтарлықтай төмендетіп, түлектердің өз күшіне деген сенімін арттыра алады.
Сонымен қатар олар балаларының жағдайына жаңаша көзқараспен қарап, мазасыздықтың себептерін тереңірек түсініп, түлектердің ішкі қысымының қалыптасуында ересектер күтулерінің қандай рөл атқаратынын ұғынды.
Осы қиын кезеңде түлектердің жанында қорқыныш пен қысым емес, түсіністік, қолдау және ертеңгі күнге деген сабырлы сенім болсын!